კაშიას და ქოჩორას გოლები: შოთამ კაცი გადაარჩინა – ლეგიონერები

გურამ კაშიამ სლოვაკეთის ჩემპიონატში გოლი გაიტანა და „სლოვანს“ შინ „დუნაისკა სტრედასთან“ მოგებაში დაეხმარა. საქართველოს ნაკრების კაპიტანმა 69-ე წუთზე გადამწყვეტი გოლი გაიტანა. მეტოქე მცველისგან უკან დაბრუნებული ბურთი თავურით გაგზავნა კარის ბადეში. ეს კაშიას მეორე გოლია მიმდინარე ჩემპიონატში. გურამმა 8.6 ქულა დაიმსახურა და მატჩის საუკეთესო მოთამაშედაც აღიარეს.

გაიტანა გიორგი ქოჩორაშვილმაც, მაგრამ ეს საკმარისი არ აღმოჩნდა „ლევანტესთვის“, რომელმაც შინ „კორდობასთან“ მოგება ხელიდან ბოლო წამებზე, მეოთხე დამატებულ წუთზე გაუშვა – 2:2.
მე-19 ტურის შეხვედრაში ქართველი ნახევარმცველი ძირითად შემადგენლობაში იყო, 85 წუთი ითამაშა და გოლის გარდა, მთლიანობაშიც დამაჯერებელად გამოიყურება.
ქოჩორას შეფასებები: Flashscore – 7.6; Sofascore – 7,5.
მის ანგარიშზე მიმდინარე ჩემპიონატში 4 გოლი და 3 საგოლე პასია.

ლა ლიგა 2-შივე, გიორგი წიტაიშვილის „გრანადა“ სტუმრად 0:2 დამარცხდა „ოვიედოსთან“. წიტაიშვილი 84-ე წუთზე შეცვალეს. მისი შეფასება 6.4-ია.

სერია B-ს მე-17 ტურში გიორგი კვერნაძის „ფროზინონემ“ გათამაშების ლიდერ „სასუოლოს“ უმასპინძლა და 1:2 დამარცხდა. ქართველი თავდამსხმელი მოედანზე 61-ე წუთზე შევიდა. შეფასება – 6,7.

უკრაინის პირველობაზე, „ოლექსანდრიასა“ და შოთა ნონიკაშვილი „ჩერკასის“ შეხვერდა 1:1 დასრულდა. ნონიკაშვილმა შეუცვლელად ითამაშა. ჰქონდა საგოლე შანსი, რომელიც ვერ გამოიყენა. სამაგიეროდ თავი სხვა მხრივ გამოიჩინა: მეორე ტაიმის დასაწყისში ჩვენიანის თანაგუნდელი ოლექსანდრ კაპლიენკო მოედანზე დაეცა. მასთან საშველად პირველი ნონიკაშვილი მიიჭრა და სიკვდილს გადარჩინა (ეპიზოდი ვიდეოში დაახლოებით 4:20 წუთიდან).
ასეთი რამ თავის დროზე ჯაბა კანკავასა და ლუკა ლოჩოშვილს აქვთ გაკეთებული.

საბერძნეთში, ლევან შენგელიას ოფი სტუმრად 0:0 ეთამაშა „ატრომიტოსს“. შენგელიამ შეუცვლელად ითამაშა და 6.7 მიიღო.

შვეიცარიაში, გაბრიელ სიგუას „ბაზელმა“ შინ 0:1 წააგო „გრასჰოპერსთან“. სიგუამ 78-ე წუთიდან ითამაშა და 6.5 დაუწერეს.

კვიპროსში, გიორგი ლორიამ და მისმა „არადიპუმ“ სტუმრად 3 გოლი გაუშვეს „ანორთოსისისგან“. ლორიამ შეუცვლელად ითამაშა და 2 სეივი შეასრულა.