იტალიაში ისევ ხვიჩაზე მსჯელობენ: ნერესთან ერთად თუ კვლავ ოსიმენთან

იტალიაში ისევ მიმდინარეობს „ნაპოლიში“ ხვიჩა კვარაცხელიას მომავლის შესახებ დისკუსია. ამჯერად საკუთარი აზრი რამდენიმე სპეციალისტმა გამოთქვა და ზოგიერთს მიაჩნია, რომ ქართველს ნერესთან ერთად თამაში შეუძლია.

ანტონიო ჯორდანო (ჟურნალისტი):
„არავის ეგონა, თუ პირველ ტურში „ვერონასთან“ დამარცხების შემდეგ, „ნაპოლის“ ახლა 38 ქულა ექნებოდა და ლიდერ „ატალანტას“ 2 ქულით ჩამორჩებოდა. კონტე თავის საქმეს კარგად აკეთებს. პროგრესი სახეზეა, თუმცა ყველას შეიძლება საკუთარი მოსაზრება გააჩნდეს. ლუკაკუ? კვარას“ და ნერესს შეუძლიათ მას დაეხმარონ და გუნდის ახალი შემტევი ტრიო შექმნან – ნერესი მარჯვნივ, კვარაცხელია მარცხნივ, ოღონდ ლუკაკუსთან ახლოს. თუ მეტოქის დაცვას გაწელავენ, უფრო სწრაფად იმოქმედებენ, ეს ლუკაკუსთვის ინექცია იქნება და შედეგს გამოიღებს“.

ანდრეა აგოსტინელი (ნაპოლის ყოფილი ნახევარმცველი და მწვრთნელი):
„ნერესი სათადარიგოთა სკამზე დაბრუნდება? ამის შესახებ კითხვას ბევრი სვამს. ეს ფსიქოლოგიური პრობლემა არაა, მთავარი გუნდია. ხვიჩას და დავიდს ერთად თამაში შეუძლიათ, ხოლო პოლიტანოს თადარიგში გადანაცვლება მოუწევს. კონტესთვის სასარგებლოა, როდესაც მის განკარგულებაში მეტი საიერიშო იარაღია. თან მათ მუშაობა მაშინაც სჭირდებათ, როცა ბურთს მოწინააღმდეგე ფლობს“.

პაოლო დელ ჯენიო (ჟურნალისტი):
„ჩემპიონატში ყველაფერი ლიდერების პირად დაპირისპირებებში გადაწყდება. ყურადღების მოდუნება დაუშვებელია, რამეთუ არაა გამორიცხული, ქულები მაშინაც დაკარგონ, როდესაც გამარჯვება გარანტირებულად მიაჩნიათ. „კვარა“ და ნერესი ერთად? თუ ისინი და პოლიტანო 100%-ით მზად არიან, მე ამ ვარიანტს არ გამოვრიცხავ. პოლიტანო შეიძლება „ვენეციასთან“ სათადარიგო იყოს, „ფიორენტინასთან“ კი ძირითად შემადგენლობაში დაბრუნდეს. კვარაცხელია და ნერესი ერთადერთი წყვილია, რომელიც მოედანზე ერთად არ გვინახავს, მაგრამ თუ ქართველი 100%-ით მზადაა…“

ანტონიო კასანო (იტალიის ნაკრების ყოფილი თავდამსხმელი):
„ადრეც ვთქვი, რომ ნერესი კვარაცხელიას კონკურენტია და არა პოლიტანოსი. ბრაზილიელი კარგი ფეხბურთელია, უკვე 1 გოლი გაიტანა და 6 საგოლე გადაცემა გააკეთა, მარცხენა ფლანგზე შესანიშნავად მოქმედებს, ამიტომ ხვიჩას სიფრთხილე მართებს. უკვე აღვნიშნე, რომ ქართველი ლობოტკას შემდეგ „ნაპოლის“ საუკეთესო ფეხბურთელად მიმაჩნია, თუმცა კონტრაქტთან დაკავშირებული სიტუაცია მოუწესრიგებელია და მასზე გავლენას ახდენს“.

–

ავტორიტეტული ესპანური გამოცემა AS წერს, რომ “ბარსელონას” სპორტული დირექტორი დეკო “ნაპოლის” საკუთრებაში მყოფი და ამჟამად “გალათასარაიში” იჯარით მოთამაშე ვიქტორ ოსიმენის გარშემო შექმნილ სიტუაციას ინტერესით აკვირდება.

აღნიშნული წყაროს ცნობით, მიმდინარე სეზონის ბოლომდე “ბლაუგრანას” მთავარ ფორვარდად რობერტ ლევანდოვსკი დარჩება, თუმცა ზაფხულში ახალი შემტევის დამატების საჭიროება დადგება.

კატალონიელებს მიაჩნიათ, რომ ოსიმენის ასაკის გათვალისწინებით, (25 წლისაა) ისეთ ფორვარდს დაიმატებენ, რომელიც გუნდის შეტევით ხაზში დიდი ხნის განმავლობაში პრობლემას მოხსნის.

შეხსენებისთვის, “ბარსელონას” სახელს აქტიურად ხვიჩა კვარაცხელიასაც უკავშირებენ და პრესაში უკვე დაიწერა ის ფაქტიც, რომ “ბლაუგრანას” წარმომადგენლები ქართველის აგენტს შეხვდნენ და სრულადაც არაა გამორიცხული, ჩვენებურმა და ნიგერიელმა კვლავ ერთად შეუტიონ.

შეხსენებისთვის, ოსიმენის გამოსასყიდ თანხად 75 მილიონი ევრო სახელდება.

sportall.ge