თოკო საუკეთესო იყო, მაგრამ ცსკა სტამბოლში განადგურდა

მოსკოვის ცსკა-ს მეშვიდე მარცხი ევროლიგის მიმდინარე გათამაშებაში. რეგულარული სეზონის 28-ე ტურის შეხვედრაში მოსკოველები სტამბოლში “ეფესს” ესტუმრნენ და 30-ქულიანი სხვაობით განადგურდნენ.

მოსკოველებს საშინელი პირველი მეოთხედი ჰქონდათ. ცსკამ საკუთარ კალათში 31 ქულა მიიღო, თავად კი, მხოლოდ 13 ჩააგდო. ანალოგიურად განვითარდა სიტუაცია მეორე მეოთხედში, რომელიც თურქებმა 24:15 მოიგეს.

დიდი შესვენების შემდეგ, არმიელებმა ვითარება შედარებით გამოასწორეს, მაგრამ მატჩში გარდატეხის შეტანა ვეღარ შეძლეს.

თორნიკე შენგელია ცსკა-ს სასტარტო ხუთეულში იყო და პარკეტზე გატარებულ 24 წუთში – 14 ქულა, 5 მოხსნა, 3 პასი და 2 ჩაჭრა მოაგროვა. თოკომ 9-დან 5 ორქულიანი, 4-დან 1 სამქულიანი და 4-დან 1 საჯარიმო ჩააგდო. თოკოს თავის გუნდში საუკეთესო მაჩვენებელი ჰქონდა.