ვიდეო: ორლანდომ ნიუ იორკი მედისონ სკვერ გარდენში დაამარცხა – როგორ ითამაშა გოგამ

ორლანდო მეჯიქმა პრინციპული მეტოქე დაამარცხა. გოგა ბითაძეს არ ჰქონია ორმაგი დუბლი, თუმცა მისი სტატისტიკა საკმაოდ პროდუქტიულია და ქართველი ცენტრის წილიც გამარჯვებაშიც უდიდესია. ორლანდოელების მეტოქე ნბა-ს აღმოსავლეთ კონფერენციის ცხრილში ერთით წინა საფეხურზე მყოფი ნიუ იორკ ნიქსი გახლდათ, თამაში კი მედისონ სკვერ გარდენში, მეტოქის მოედანზე გაიმართა. მართალია ნიქსი 3 მოგებით უსწრებდა მეჯიქს და ეს მოგება ცხრილში ცვლილებას ვერ გამოიწვევდა, თუმცა გამარჯვებას მაინც უდიდესი მნიშვნელობა ჰქონდა – ერთი ფსიქოლოგიური და მეორე – არითმეტიკული. ამ გამარჯვებით ორლანდომ ცხრილში მის წინ მყოფ გუნდთან ჩამორჩენა უშუალო დაპირისპირების შედეგად შეამცირა.

მატჩი ორლანდომ 103:94 მოიგო. ბითაძე სასტარტო ხუთეულში იყო, მაგრამ მოედანზე ბოლო მატჩებთან შედარებით ოდნავ მცირე დროით იმყოფებოდა. 22 წუთში გოგამ 6 ქულა, 8 მოხსნა, 4 პასი და 3 დაფარება მიითვალა. ქართველმა ცენტრმა 5 ცდიდან 3 ორქულიანი ჩააგდო.

სათადარიგო იყო ვენდელ კარტერი – ცენტრი, რომელიც წინა და ამ სეზონის დასაწყისში სასტარტო იყო და გოგას კარგი თამაშის შედეგად ეს სტატუსი დაკარგა. უფრო ზუსტად, კარტერი ბითაძესთან ერთად სასტარტოში თამაშს იწყებს ხოლმე, თუმცა როგორც ჩანს, მეჯიქის მწვრთნელს გუნდის მეფარეთა საროტაციო საკითხი ბოლომდე არ განუხილია და მათ პოზიციებს პერიოდულად უცვლის. თუმცა ეს უფრო კარტერს ეხება, რომელიც ხან სათადარიგოა და სასტარტოში თამაშს თუ იწყებს, იქ უცილობლად არის ბითაძეც.

ამჯერად კარტერი შეცვლაზე შევიდა, 26 წუთი ითამაშა და საკმაოდ შედეგიანადაც. მის ანგარიშზე 19 ქულა და 4 პასი დაგროვდა. კარტერმა 3 ცდიდან 3 სამქულიანი ჩააგდო, რაც საკმაოდ დიდი ბონუსი გახლდათ ორლანდოელებისთვის. ის რიგით მეორე მექულე გახლდათ ორლანდოში 24 ქულის მიმთვლელ კოულ ენტონის შემდეგ.

აღმოსავლეთ კონფერენციაში მესამე ადგილზე მყოფ ნიუ იორკს 24 მოგება და 13 მარცხი აქვს, მეოთხეადგილოსან ორლანდოს ამ შედეგთა შეფარდება კი ასეთია: 22-16. შემდეგ მატჩს ორლანდო 10 იანვარს, შინ მინესოტასთან გამართავს, რომელსაც მიმდინარე სტატისტიკით ლიგის საუკეთესო ცენტრი, კარლ ენტონი თაუნსი ჰყავს.