გლაზგო გზის ნაწილია, რომელიც ოცნებისკენ მიგვიყვანს: რა არის საქართველოს მთავარი ამოცანა და რას ელოდება სანიოლი

საქართველოს ნაკრები ევროპის ჩემპიონატის საკვალიფიკაციო ეტაპის მესამე შეხვედრას დღეს, 20 ივნისს, გლაზგოში, შოტლანდიის წინააღმდეგ გამართავს.

ჯგუფის ლიდერთან მატჩამდე ერთი დღით ადრე, ჩვენმა გუნდმა მატჩის მასპინძელ ჰემპდენ პარკზე ივარჯიშა. საწვრთნელ პროცესში 25 ფეხბურთელი მონაწილეობდა.

ვარჯიშის დაწყებამდე, საქართველოს ნაკრების მთავარმა მწვრთნელმა, ვილი სანიოლმა პრესკონფერენცია გამართა.

ვილი სანიოლი:
“კვიპროსთან ჩვენც და გულშემატკივარიც მეტს ელოდა, თუმცა მთავარი გამარჯვება და მოპოვებული 3 ქულაა. ალბათ ნახეთ საფრანგეთისა და გიბრალტარის მატჩი. საფრანგეთის ნაკრებს კარგად არ უთამაშია, თუმცა გამარჯვებით ყველა ბედნიერია. დაახლოებით 20 თვეა ოფიციალური თამაში არ წაგვიგია. ყოველთვის კარგად ვერ ითამაშებ, თუმცა როდესაც კარგ მატჩს არ ატარებს და ქულებს აგროვებს, კარგის ნიშანია. მომეწონა ჩემი ფეხბურთელების ხასიათი ბოლო წუთებში. არ დანებდნენ და სწორედ ამიტომ ვართ კმაყოფილები შედეგით.

ვფიქრობ, კვიპროსში გარკვეული ხარვეზი ის იყო, რომ შემტევი ფეხბურთელები დაცვას საკმარისად არ ეხმარებოდნენ, რამაც ბალანსის დარღვევა გამოიწვია. შემადგენლობა ძალიან შემტევი იყო, რამაც დაგვანახა, რომ ბალანსის დაცვა მნიშვნელოვანია. ამას შევცვლით, რათა შოტლანდიასთან უფრო კომპაქტურად ვითამაშოთ.

შოტლანდიაში ყოველთვის განსაკუთრებული საფეხბურთო ატმოსფეროა. აქ ნაკრებთან ერთად და საკლუბო დონეზე მითამაშია, თუმცა წარსულს არანაირი მნიშვნელობა არ აქვს. მეც და ჩემი მოთამაშეებიც მოუთმენლად ველით განსაკუთრებულ საფეხბურთო გარემოში თამაშს. ვიმედოვნებ, კარგი თამაში გამოვა, რომელშიც ორივე გუნდი კარგად ითამაშებს და გამარჯვება უკეთესს დარჩება.

როდესაც 5-გუნდიან ჯგუფში ჩასატარებელი 8 მატჩიდან საწყის 3 შეხვედრას მოიგებ, საკვალიფიკაციო ეტაპის წარმატებით დასრულების შანსი დიდია. ვულოცავ მეტოქეს ასეთ შედეგს. ვფიქრობ, შოტლანდიას უფრო დიდი წნეხის ქვეშ მოუწევს თამაში, რადგან საკუთარ კედლებში მათგან მხოლოდ მოგებას ელიან. ჩვენ კი, ჩვენი საუკეთესო თამაში უნდა ვაჩვენოთ და წარმოვაჩინოთ ის დადებითი დინამიკა, რომელიც ბოლო პერიოდში გვაქვს. ნორვეგიასთან შეხვედრის ბოლო 10 წუთში გამოჩნდა, რამდენად დიდი რესურსი აქვს შოტლანდიის ნაკრებს. ნორვეგიაში თამაშის შემოტრიალება და გამარჯვების ბოლო წუთებზე მოპოვება ბევრს არ შეუძლია. სწორედ ამიტომ, მეტოქეს დიდ პატივს ვცემთ. თუმცა, აქამდე ჩატარებული ყველა მატჩი უკვე წარსულია და ვეცდებით, რომ საქართველოს ნაკრებისთვის ახალი ისტორია დავწეროთ.

საქართველოს ნაკრებს დიდი რესურსი აქვს და ეს არაერთხელ გამოვლინდა. მყავს მოთამაშეები, რომლებსაც ნებისმიერი მეტოქის დამარცხება შეუძლიათ. ჩვენი მთავარი ამოცანა კონცენტრაციის, დისციპლინის შენარჩუნებაა. ფეხბურთელებს ვენდობი, ვიცი, რომ ყოველთვის აქვთ მოტივაცია გახდნენ უკეთესები, გააცნონ თავი მთელ ევროპას. მათ უყვარს საკუთარი ქვეყანა და ყოველთვის მაქსიმუმი სურთ. ბევრი ოცნება გვაქვს და იმედი მაქვს, რომ გლაზგო ერთ-ერთი ნაწილია იმ გზის, რომელიც ჩვენი ოცნებისკენ მიგვიყვანს.

ყველასთვის ნათელია, რომ ხვიჩა კვარაცხელია საქართველოს ნაკრების წამყვანი მოთამაშეა და ასე იქნება ყველა გუნდში, სადაც ითამაშებს. მას ძალიან მაღალი დონის სეზონი ჰქონდა, გამორჩეული მაღალი დონის მატჩებით. ასეთი სეზონის შემდეგ, ივნისში ფეხბურთელებისთვის არ არის მარტივი სანაკრებო შეხვედრების ჩატარება. კვარაცხელია ერთ-ერთი გამორჩეულია ჩვენს გუნდში. როდესაც ლიდერებზე ვსაუბრობთ, ხშირად ეს მხოლოდ შემტევებს ეხებათ, თუმცა ასევე მინდა გამოვყო სხვა პოზიციის ფეხბურთელები. ფეხბურთი გუნდური სპორტია, სადაც მთავარი გუნდური სულისკვეთება და დისციპლინაა. შეხვედრაში ფეხბურთელებისგან სწორედ ამას ველოდები”.