ბენფიკა ინგლისიდან 17 წლის გიორგი ჩუბინიძეს იწვევს

შესაძლოა, ახალ სეზონში პორტუგალიურ გრანდში, „ბენფიკაში“ ქართველი ტალანტი, 17 წლის გიორგი ჩუბინიძე ვიხილოთ, – ამის შესახებ საქართველოს პირველ არხთან მისმა მენეჯერმა, დემნა ოზაშვილმა განაცხადა.

„ამ ეტაპზე მიმდინარეობს მოლაპარაკება რამდენიმე ევროპულ კლუბთან. წინა კვირას გვქონდა შეხვედრა „ბენფიკას“ წარმომადგენლებთან. პორტუგალიური გრანდის გარდა, ინტერესს რამდენიმე ესპანური კლუბიც იჩენს, თუმცა ყველაზე აქტიურები სწორედ პორტუგალიელები არიან.

გიორგის „ბორნმუთთან“ კონტრაქტი აკავშირებს, ამიტომ მიმდინარეობს მოლაპარაკება სატრანსფერო დეტალებზე შეთანხმების მისაღწევად. ის ინგლისში შესანიშნავ სეზონს ატარებს – 14 თამაშში ექვსი გოლი და ოთხი საგოლე გადაცემა აქვს შესრულებული, ერთხელ კი მისი გოლი თვის საუკეთესოდ აღიარეს. ვიმედოვნებთ, რომ გიორგი მალე საქართველოს ნაკრებსაც დაეხმარება“, – ამბობს დემნა ოზაშვილი.

შეგახსენებთ, რომ ახლახან პორტუგალიურ გრანდს, „სპორტინგს“ გიორგი ქოჩორაშვილი შეუერთდა. მანამდე „ავეშში“ გიორგი აბურჯანია ჩაირიცხა, ხოლო „ფამალიკაოში“ – ოთარ მამაგეიშვილი.

1tv.ge