in

უმაყურებლო ისრაელთანაც წავაგეთ: საქართველო აკროპოლისის ასაღებად მიდის

საქართველოს ნაკრებმა ისრაელთან მეორე ტესტ-მატჩი გამართა და ისევ დაუთმო – 68:81.
ეს შეხვედრა დახურული იყო და მას მაყურებელი არ დასწრებია.

საქართველომ ორი განსხვავებული ტაიმი ითამაშა. ჩვენი გუნდი პირველ ნახევარში მეტოქეს ჯობდა, რაც სწორი დაცვისა და გააზრებული მოქმედების შედეგი გახლდათ, ხოლო მეორეში ვეღარ იყო მოწოდების სიმაღლეზე, გარკვეული ტაქტიკური შეცდომები დაუშვა და საბოლოოდ დამარცხდა კიდეც.

პირველი პერიოდი ქართველებმა 22:18 მოიგეს, ხოლო მეორეში კიდევ უფრო იყოჩაღეს და მეტოქე 9 ქულით – 41:32 ჩამოიტოვეს. პირველი ნახევრის დასრულებამდე 1 წამით ადრე ისრაელის ნაკრების ნახევრადქართველმა გაბრიელ ჭაჭაშვილმა ორქულიანი მიითვალა და დიდი შესვენებისთვის ისრაელის ჩამორჩენა 7 ქულამდე შეკვეცა – 34:41.

მესამე პერიოდში საქართველოს ნაკრებს ჩავარდნა ჰქონდა, რის გამოც ილიას ზუროსმა მოთამაშეებს მკაცრი გაფრთხილებები მისცა. ათწუთეული ქართველებმა 14:28 წააგეს და ბოლო პერიოდის წინ 7 ქულით – 55:62 ჩამორჩნენ. ბოლო პერიოდში შედარებით თანაბარი თამაში გაგრძელდა. შეხვედრის დასრულებამდე სამზე ოდნავ მეტი რჩებოდა და სტუმრები 4 ქულით იგებდნენ, თუმცა დარჩენილ დროში კაპიტნისა და ლიდერის, თორნიკე შენგელიას გარეშე (დაგეგმილი დასვენება) მოთამაშე ქართველებმა არაერთი შეცდომა დაუშვეს და საბოლოოდ 13 ქულით დამარცხდნენ.

ორივე გუნდის შემადგენლობაში ყველაზე შედეგიანი სანდრო მამუკელაშვილი იყო, რომელმაც 16 ქულა, 10 მოხსნა და 3 პასი მიითვალა. 15 ქულა და 9 მოხსნა გიორგი შერმადინის ანგარიშზეა, დუდა სანაძემ 9 ქულა მოაგროვა, ბექა ბურჯანაძემ – 8, ხოლო გიორგი ცინცაძემ და თედ მაკფადენმა თავი 7-7 ქულას მოუყარეს.

ამით საქართველოს ნაკრებმა თბილისში ამხანაგური მატჩები დაასრულა და ორშაბათს, გამთენიისას, ათენში მიემგზავრება, სადაც ტრადიციულსა და ცნობილ საერთაშორისო ტურნიზე – “აკროპოლისის თასზე” იასპარეზებს. საბერძნეთის დედაქალაქი აღნიშნულ ამხანაგურ ტურნირს 31-ედ მასპინძლობს და ის 2017 წელს საქართველოს ნაკრებს მოგებული აქვს, როცა სერბეთსა და საბერძნეთს მოუგო, იტალიასთან კი დამარცხდა, მაგრამ თასი მაინც საქართველოში ჩამოიტანა.

წლეულს საქართველო მეორედ იასპარეზებს “აკროპოლისის თასზე” და ჩვენი ნაკრების განრიგი ასეთი იქნება:

17 აგვისტო: თურქეთი – საქართველო
18 აგვისტო: საქართველო – საბერძნეთი
19 აგვისტო: საქართველო – პოლონეთი

მატჩების პირდაპირ ტრანსლაციას საქართველოს საზოგადოებრივი მაუწყებელი განახორციელებს.

ავტორი Vakhtang Daraselia

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

Loading…

0